Mysafir nderi i asaj mbrëmjeje ishte Zonja Margriet Struijf, drejtoreshë e zyrës diplomatike të Holandës në Prishtinë, ndërsa  një mysafir tjetër i shquar ishte edhe Prof. Enver Hasani, Rektor i Universitetit të Prishtinës, i cili në fjalimin që e mbajti e falënderoi BSCK-në për ndihmën që ia ka dhënë studentëve të UP-së si dhe ndërmarrësve të tjerë të rinjë për fillimin e bizneseve të tyre. Rektori Hasani gjithashtu foli edhe për rëndësinë e trajnimeve të BSCK-së dhe transferit të kredive (ECTS)  përmes certifikatave të akredituara si dhe për Punëtorinë për Zhvillimin e Programit të mbajtur në mënyrë që të inkorporohen modulet e BSCK-së me metodologjinë e mësimit në Fakultetin Ekonomik dhe në Programin e Shkollës së Biznesit në Pejë.
Folësi i radhës në këtë ceremoni ishte Mr. Nebojsa Simic, ish ekspert dhe trajner i BSCK-së ndërsa tani drejtor i BSC-së në Kragujevc. Zoti Simic kujtoi momentet e mrekullueshme që i kishte përjetuar gjatë kohës sa ishte trajner i modulit të parë në ciklin e parë te BSCK-së. Ai foli për rëndësinë e BSC Kosovo si një shembull të mirë për BSC-të tjera në rajon.
Pastaj, Armend Ukshini – pjesëmarrës i BSCK-së përshkruajti se si trajnimi i BSCK-së ka zgjeruar horizontet e tij biznesore, dhe se si ai ka mësuar që dobësitë në biznes t’i shndërrojë në pika të fuqishme. “Kur kam filluar të ndjekë Trajnimin për Aftësi Biznesore që zgjat 10 javë, unë pata të veshur pantallona me shumë xhepa dhe një maicë, ndërsa në fund të trajnimeve isha i veshur me kostum solemn” tha Armendi duke u munduar të portretizojë mënyrën e influencimit të BSCK-së ndaj tij.